Mikilvægt er að vel sé staðið að dreifingu áburðar þar sem mikil verðmæti eru í húfi fyrir bændur. Fyrir utan að velja réttan dreifingartíma m.t.t. ástands jarðvegs og gróðurs er mikilvægt að ástand og stillingar áburðardreifara séu í góðu lagi. Jöfn og góð dreifing áburðarins er forsenda þess að hann nýtist sem skyldi.

Til að tryggja jafna dreifingu áburðarins býður YARA eingöngu upp á einkornaáburð þar sem öll næringarefnin eru í hverju áburðarkorni og þyngd og lögun kornanna hefur verið þróuð til þess að falla sem best að dreifieiginleikum þyrildreifara. Kornagerð áburðar er mismunandi eftir framleiðsluaðferðum. Ýmist er um að ræða hrjúfkorn (granulert) eða gljákorn (prillet). Gljákorn eru hnöttóttari og hálli en hrjúfkorn. Við sömu stillingu áburðardreifara renna gljákorn því hraðar úr dreifaranum en hrjúfkorn. Allar tegundir Yara-áburðar, sem hér eru í boði, eru hrjúfkorn nema Kalksaltpétur sem er gljákorn.

Ekki er nóg að vanda til áburðaráætlunar og vals á áburðartegund ef dreifingin misferst. Með öllum áburðardreifurum eiga að fylgja leiðbeiningar um notkun þeirra. Algengast er að nota svokallaða þyrildreifara við dreifingu tilbúins áburðar. Þeir eru afkastamiklir en krefjast vandvirkni við notkun. Upplýsingar um áburðardreifara sem prófaðir hafa verið hjá Bútæknideild RALA má finna á vefsíðu Rannsóknastofnunar landbúnaðarins www.rala.is undir Bútæknisvið - Búvélaprófanir.

Nokkur atriði sem þarf að gæta að við dreifingu áburðar með þyrildreifurum:

• Fylgja leiðbeiningum (sem ættu að fylgja) um stillingu og notkun dreifara.
• Gæta þess við tengingu á þrítengibeisli dráttarvélar að dreifarinn sitji rétt og kasti lárétt frá sér, bæði til hliðar og aftur (stillingar á beisliskjálkum og yfirtengi).
• Gæta þess að dreifimagn sé rétt og jafnt yfir alla spildu.
• Nota rétta magnstillingu (opnun) á dreifara.
• Aka með réttum og jöfnum hraða.
• Gæta þess að aflúttak snúist á réttum hraða.
• Þrif, smurning og annað viðhald dreifara sé reglulegt og gott.
• Með hæfilegri skörun milli umferða fæst jöfn dreifing áburðar.

Ráð til þess að hámarka nýtingu áburðarefna:

• Bera tilbúinn áburð á þegar grös eru reiðubúin til þess að taka upp næringarefni. Fosfór og kalí bindast í jarðvegi að einhverju marki en úrkoma getur valdið útskolun og einnig er hætta á að köfnunarefni tapist með uppgufun ef næringarefnin eru ekki bundin í jarðvegi og gróðri fljótlega eftir dreifingu. En þegar tún fara að grænka að vori má gera ráð fyrir að grösin séu farin að bíða eftir að fá næringu og tímabært að hefja áburðardreifingu.
• Best er að dreifa búfjáráburði að vori en einnig að hausti áður en jörð frýs. Þar sem úrkoma er mikil, tún liggja í halla og stutt er í vatnsfarvegi getur verið hætta á næringarefnatapi vegna afrennslis þannig að taka þarf tillit til staðbundinna aðstæðna.